टोलाएर बिताउँछु मेरा हरेक रातहरू

टोलाएर बिताउँछु मेरा हरेक रातहरू
सजाउँछु मिलाउँछु वेदनाका खातहरू
 
दुष्टहरूको दुनियामा बाँच्न पनि गाह्रो भयो
निरीहलाई खेदो गर्छन् दुस्मनका जातहरू
 
वसन्तको पछिपछि आउँछ उही उजाड शिशिर
रुखलाई नङ्ग्याएर झरी जान्छन् पातहरू
 
बोतलमात्र यौटा साथी बाँकी रह्यो जिन्दगीमा
तर रक्सीभन्दा कडा तिरस्कारका मातहरू
 
बैरी त बैरी थिए चिनेको थेँ जानेको थेँ
तर साह्रै घातक भए साथीका आघातहरू
 
उसले आँसु झार्योा मैले टुलुटुलु हेरिरहेँ
कुबेलामै कुँजिएछन् 'निखिल'का हातहरू